Kamal Tamang 
काठमाडौं । नेकपा एमालेका केन्द्रीय सदस्य परशुराम अधिकारीले गत २४ भदौमा भएको जेनजी आन्दोलनमा पार्टी कार्यकर्ताकै संलग्नता भएको विषयमा अनुसन्धान गर्न माग गरेका छन् ।
बिहीबार पार्टीको केन्द्रीय कमिटी बैठकमा आफ्ना धारणा राख्ने क्रममा उनले सो आन्दोलनको क्रममा एमाले कार्यकर्ताहरूकै पनि नगन्य रुपमा उपस्थिति देखिएको भन्दै अनुसन्धान अघि बढाउनुपर्ने बताएका हुन् ।
‘२४ गतेको आगजनी, तोडफोड लगायतका घटनामा हाम्रो कार्यकर्ता पनि नगन्य रुपमा उपस्थिति देखिन्छ,’ उनले भने, ‘यसमा सुक्ष्म अनुसन्धान हुनुपर्छ ।’ साथै, उनले पार्टीको आन्तरिक एकतामा जोड दिन पनि आग्रह गरे ।
बैठकमा आफ्ना धारणा राख्ने क्रममा अधिकारीले पार्टीमा निषेधको भावना नभइ उपयुक्त जिम्मेवारी दिनुपर्ने बताए । उनले पूर्वराष्ट्रपति विद्यादेवी भण्डारीको सदस्यता नवीकरण रोक्न नहुने बताउँदै उनलाई पनि उपयुक्त जिम्मेवारी दिन पाटी नेतृत्वसमक्ष आग्रह गरेका छन् ।
