Kamal Tamang 
काठमाडौं। मंगलबार सेयर बजारमा उच्च अंकको वृद्धि देखिएको छ । अघिल्लो कारोबार दिन पनि बढेर कारोबार भएको बजार आज ६२.२९ अंकले बढेको हो ।
आज अघिल्लो दिनको भन्दा २.४८ प्रतिशतले बढेर बजार परिसूचक २५७१.३४ विन्दुमा पुगेको छ । आज सेयर बजारमा कारोबार भएका कम्पनीमध्ये २३६ कम्पनीको सेयर मूल्य बढेको छ भने १२ कम्पनीको सेयर मूल्य मात्रै घटेको छ । आज २ कम्पनीको सेयर मूल्य भने आज स्थिर रहेको छ ।
त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि ११.९७ अंकले बढेर ४४८.९७ विन्दुमा पुगेको छ । आज १३ उपसूचकमध्ये १२ वटाको सेयर मूल्य बढेको छ भने १ वटाको मात्रै घटेको छ ।
परिसूचकसँगै आज कारोबार रकममा पनि सुधार देखिएको छ । अघिल्लो कारोबार दिन साढे २ अर्ब भन्दा बढीको कारोबार भएको बजारमा आज भने साढे ४ अर्ब माथिको कारोबार भएको छ ।
सेयर बजारमा ३१४ कम्पनीका ९२ लाख ४३ हजार ७२३ कित्ता सेयर ४७ हजार ९४ पटक खरिद बिक्री हुँदा ४ अर्ब ५७ करोड ३९ लाख ४३ हजार ४०५ रुपैयाँको कारोबार भएको छ ।
