Kamal Tamang 
काठमाडौं । अमेरिकाको मिनेसोटा राज्यमा आप्रवासन र भन्सार प्रवर्तन (आइसीई) विरुद्ध प्रदर्शनकारीहरूले एक चर्चभित्र पूजा भइरहेका बेला अवरोध पुर्याएको घटनाप्रति अमेरिकी राष्ट्रपति डोनाल्ड ट्रम्पले कडा आपत्ति जनाएका छन् ।
उनले धार्मिक पूजा–आराधनामा हस्तक्षेप सह्य नहुने स्पष्ट पारेका छन् । आइतबार सेन्ट पलस्थित सिटिज चर्चमा पूजा सञ्चालन भइरहेका बेला प्रदर्शनकारीहरू चर्चभित्र प्रवेश गरी नाराबाजी गरेका थिए ।
सामाजिक सञ्जालमा सार्वजनिक भिडियोहरूमा प्रदर्शनकारीहरूले ‘जस्टिस फर रेनी गुड’ र ‘आइस आउट’ जस्ता नारा लगाउँदै श्रद्धालुहरूसँग सामना गरेको देखिन्छ ।
ह्वाइट हाउसकी प्रेस सेक्रेटरी क्यारोलिन लेभिटले सामाजिक सञ्जाल एक्समा लेख्दै राष्ट्रपति ट्रम्पले पवित्र उपासना स्थलमा इसाईहरूलाई डराउने र हैरानी दिने कार्य कदापि सहन नसकिने बताएका छन् ।
उनले न्याय मन्त्रालयले उक्त घटनाबारे पूर्ण छानबिन शुरू गरिसकेको जानकारी दिइन् । घटना त्यसपछि चर्किएको हो, जब चर्चका एक पादरी अमेरिकाको आप्रवासन तथा भन्सार प्रवर्तन निकायमा वरिष्ठ भूमिकामा रहेको दाबी अनलाइनमा फैलिएको थियो ।
यसै विषयलाई लिएर प्रदर्शनकारीहरूले चर्चलाई लक्षित गरेका बताइएको छ । उक्त प्रदर्शन मिनियापोलिस(सेन्ट पल क्षेत्रमा हालै देखिएका व्यापक विरोध प्रदर्शनहरूको हिस्सा भएको बताइएको छ ।
यस क्षेत्रका ३७ वर्षीया रेनी निकोल गुडलाई यसै महिना एक एजेन्टले गोली हानी हत्या गरेको घटनापछि संघीय निकाय र स्थानीय समुदायबीच तनाव बढ्दै गएको छ । चर्च घटनाप्रति प्रतिक्रिया दिँदै अमेरिकी न्याय मन्त्रालयले नागरिक अधिकारसम्बन्धी छानबिन शुरू गरेको जनाएको छ ।
