Kamal Tamang 
काठमाडौं । उखुको बक्यौता भुक्तानी रकम माग गर्दै उखु किसानहरुले आईतवारदेखि आन्दोलन जारी राखेका छन् । उक्त आन्दोलनलाई निरन्तरता दिँदै आज पनि किसानले उखुको भुक्तानीको माग राख्दै काठमाडौंको माइतिघरदेखि नयाँ वानेश्वरसम्म प्रदर्शन गरेका हुन् ।
सरकारले तोकेको प्रतिक्वीन्टल ७० रुपैयाँका दरले अनुदान भुक्तानी गर्नुपर्ने उखु किसानको माग छ। यस्तै उनीहरुले उखुको मुल्य प्रतिक्वीन्टल एक हजार रुपैयाँ पुर्याउनुपर्ने माग अगाडी सारेका छन् ।
प्रदर्शनमा किसानले ‘उखु किसानको अनुदान कटौती गर्न पाइँदैन’, ‘उखु कृषक शोषण बन्द गर’, ‘किसानसँग भएका सम्झौता लागू गर’ लगायत माग लेखिएको प्लेकार्ड बोकेका थिए ।
नेपाल उखु उत्पादक महासंघको नेतृत्वमा किसाहरु सडक आन्दोलनमा होमिएका हुन् । सरकारले किसानलाई दिँदै आएको अनुदान रकम प्रतिक्विन्टल ७० रुपैयाँबाट घटाएर ३५ रुपैयाँमा झार्ने निर्णय गरेको छ । उक्त निर्णयको बिरोधमा किसानले काठमाडौं केन्द्रित आन्दोलन थालेका हुन् ।
